گۆڤارا رووگەهـ ژمارە ١٥ تەباخا ٢٠٢٢

سه‌نته‌رێ زاخۆ بۆ ڤه‌كۆلینێن كوردی هژمارا نوی یا گۆڤارا خوه‌ پێشكێشی خوینده‌واران دكه‌ت، ئه‌ڤێ هژمارێ ژى چه‌ندین گۆتار و ڤه‌كۆلین ل سه‌ر مێژوو و ئه‌ده‌بیاتا كوردان بخوه‌ڤه‌ گرتینه‌ و وه‌ك هه‌ر جار ڕێبازا نویبوون و جیاوازبوونێ دڤێ هژمارێدا هاتیه‌ په‌یره‌و كرن، ئانكو چه‌ندین لایه‌نێن نوی ژ دیروكا كوردان دا هاتینه‌ ڕۆهنكرن و په‌رده‌ ل سه‌ر ژیانا چه‌ند كه‌سایه‌تیێن ئه‌ده‌بی هاتیه‌ لادان كو به‌ری نوكه‌ یان نه‌دهاتنه‌ نیاسین یان پێزانین ل سه‌ر زۆر كێم بوون.

هه‌رچه‌نده‌ كو گۆڤارا رووگه‌هـ پووته‌یێ دده‌ته‌ هه‌می لایه‌نێن دیرۆك ، ئه‌ده‌بیات ، فولكلور ، زانست ، بیروباوه‌ر و فه‌لسه‌فه‌یێن كوردی و هه‌می ئه‌و ملله‌تێن د كوردستانێدا دژین، لێ د پتریا هژمارێن گۆڤارێدا بتنێ ئه‌و دوو لایه‌نێن ل ده‌ستپێكێ مه‌ دیاركرین دهێنه‌ پێشچاڤ و ئه‌گه‌رێ ئەڤێ چه‌ندێ ئه‌وه‌ كو نڤیسه‌رێن بوارێن دی د نڤیسینا به‌رهه‌ماندا زور دكوهن، وهه‌رچه‌نده‌ كو پێزانینێن ئێكجار زۆر ل سه‌ر پشكداریا كوردان د ژیانا زانستی وفه‌لسه‌فی و بوارێن زمانناسی و ده‌رونناسی و…هتد هه‌نه‌ لێ خه‌مسارییه‌ك ددووڤچوون وئاشكه‌را كرنا ئەڤان لایه‌نان دا هه‌یه‌، و زێدەباری هندێ ئه‌ڤ گۆڤاره‌ ژلایێ سه‌نته‌ره‌كێ زانستیێ ئه‌كتیڤ و چالاك دهێته‌ ده‌رخستن و د دورهێله‌كێ (ڕه‌وشه‌نبیری) دا به‌لاڤ دبیت، لێ ژ كێمیا به‌رهه‌مێ ده‌گمه‌ن، كو ل گەل سیاسه‌تا گۆڤارێ بگونجیت،دنالیت!

دئەڤێ هژمارێدا ڕۆناهی ل سه‌ر چه‌ندین لایه‌نێن دیرۆكا میرگه‌هێن كوردی هاتیه‌ به‌ردان ، وه‌ك به‌دلیس ، هه‌كاری ، به‌هدینان و داسن و نڤیسه‌ران ب ژێده‌ر و به‌لگه‌یێن نوی شیاینه‌ چه‌ندین پێزانینێن نوی ل سه‌ر بێدار پێزانینێن كه‌ڤن زێده‌ بكه‌ن،هه‌روه‌سا دبوارێ ئه‌ده‌بیاتێدا ژیان و به‌رهه‌مێ چه‌ندین هوزانڤانێن كلاسیك هاتینه‌ ئاشكه‌را كرن وه‌ك شێخ شه‌مسه‌ددینێ ئه‌خلاتی ، شێخ عه‌سكه‌ریێ ئاقته‌پی، مه‌لا یووسفێ زڤنگی و شێخ محه‌مه‌د نووروللاهـ سه‌یدایێ جزیری…

“هـیـڤـیـداریـن كـو ئـه‌ڤ هژماره‌ ژى وه‌كـی یـێـن بـه‌رى خـوه‌ قـولاچـه‌كـا تاڕی ژ شارستانیا كوردستانێ ڕۆهن بـكه‌ت و خـوانده‌ڤـان، خوه‌شیێ ب خواندنا پێزانینێن ئەوێ ببه‌ت”

^{د. نزار أیوب حسن، زانكۆیا زاخۆ / پشكا مێژوو / سەرنڤیسەر}