گۆڤارا رووگەهـ ژمارە ١٨ ئادارا ٢٠٢٥

جاش و هێلێن سۆر

د.نزار ئەیووب حەسەن / زانكۆیا زاخۆ / پشكا مێژوو / سەرنڤیسەر
جاشاتی ئه‌و ناڤێ كرێته‌ كو بوویه‌ ناسناڤێ هنده‌ك كوردان و ئه‌و ناڤێ جوانه‌ كو ل هه‌ژى به‌ژنا ئه‌وان كه‌سانه‌ كو ئاماده‌ بووینه‌ ڕوومه‌ت و كه‌رامه‌تا خۆ‌ ب به‌هه‌یه‌كێ كێم بۆ دژمنان بفروشن. ئه‌ڤ ته‌رزێ خۆ‌ ئه‌رزانكرنێ ب تنێ د ناڤ ملله‌تێ مه‌دا نینه‌ و د ناڤ ملله‌تێ مه‌دا ژى ته‌نها ل ئەڤی سه‌رده‌می په‌یدا نه‌بوویه‌ به‌لكو به‌رده‌وام هنده‌ك كه‌سان خۆ ب سه‌ر ئەڤی جۆرێ بێ به‌هایێڤه‌ دیتییه‌ و هه‌ولداینه‌ كو ب ڕێكا ئه‌رزانكرنا ملله‌ت و وه‌لاتێ خۆ‌ بهایێ خۆ‌ ل ده‌ف دوژمنان بلند بكه‌ن.
لێ ده‌مێ به‌رپه‌رێن مێژوویێ دخوینین و سه‌رهاتییێن ئه‌وان كه‌سان دخوینین كو ب ئاستێ جاشاتییێ ڕازیبووین؛ دێ بینن كو ئه‌و د چاڤێن بیانیاندا ژى ب تنێ پرتاله‌كێ گه‌نی و بێ بها بوون، و ئه‌و ل ئاستێ ئەوان ئاژه‌لان ددیتن كو ب هه‌ستیكه‌كێ ڤه‌روتی ڕازی دبن، به‌لكو گه‌له‌ك ژ ئەوان ب ئاشكه‌رایی دیار كرینه‌ كو ئه‌و ئاماده‌نه‌ ڕێزێ ل دوژمنێ خۆ‌ یێ ب كه‌رامه‌ت بگرن لێ ده‌مێ ئه‌و خائین و جاشه‌كی دبینن؛ عێلنجی دهێنه‌ ئەوان و ژبه‌ر بێهنا ئەوان یا گه‌نگی ده‌ڤ و دفنێن خۆ‌ دگرن! دبێژن نابلیوونی دگۆت: ئه‌و كه‌سێ خیانه‌تێ ل وه‌لاتێ خۆ‌ دكه‌ت وه‌ك ئەوی كه‌سییه‌ یێ مالێ بابێ خۆ‌ ددزیت و دده‌ته‌ دزیكه‌رێن دی، ڤێجا نه‌ بابێ ئەوی لێ دبووریت و نه‌ دزیكه‌رێن دی ڕێزێ لێ دگرن. و گۆتنه‌ هێتله‌رى پیسترین مرۆڤ ل ده‌ف ته‌ كینه‌؟ گۆت ئه‌وێن هاریكارییا من كرین داكو وه‌لاتێ ئەوان داگیر بكه‌م.
مه‌ره‌ما مه‌ ژ ئەڤێ نڤیسنێ‌ ئه‌وه‌ نینە كو په‌یڤا جاش شڕۆڤه‌ بكه‌ین یان بێ ئه‌خلاقییا خیانه‌تكار و خوەفرۆشان ئاشكرا بكه‌ین به‌لكو مه‌ دڤێت ببێژین كو جاشێن ئه‌ڤرۆ خۆ‌ دكراسێ مرۆڤێن خه‌مخۆرێن ملله‌تیدا نیشان دده‌ن و ب هاریكارییا دوژمنان تا ڕاده‌یه‌كی سه‌ركه‌فتی بووینه‌، و گه‌هشتییه‌ ئەوی ڕاده‌ی كو ب بێ شه‌رمی و ب هه‌می ڕووقایمیڤه‌ ل سه‌ر شاشێن تی ڤییان یان د كوڕ و كۆمبووناندا شانازییێ ب خوەفرۆشییا خۆ‌ دبه‌ن و ل پشت په‌رده‌یا چاكسازی و مافێ ملله‌تی هه‌می پیرۆزییێن ئەڤی ملله‌تی بن پێ دكه‌ن، سه‌ركرده‌ و خه‌باتگێر و شۆڕه‌شگێر و شه‌هیدێن وه‌لاتی ڕویس و ڕیسوا دكه‌ن و دبنه‌ ئه‌و ماهولێ دوژمن ژبۆ هه‌رفاندنا دیوارێ ئاڤایێ وه‌لاتی بكار دهینن. ما تو نابینی كو ل ئەڤێ دووماهییێ ل پێلا مووچه‌ و “شایسته‌یێن هاوه‌لاتییان” سووار بووینه‌ و ل بن ئه‌ڤى ده‌مامكی هندى شیاینه‌ درب ل وه‌لاتێ مه‌داینه‌ و ده‌ستكه‌فتێن ب سه‌دان سالان و ب ڕووبارێ خوینێ بده‌ستڤه‌ هاتین، دده‌نه‌ به‌ر هێرشێن خۆ‌ یێن شه‌رمزار، تا ڕاده‌یه‌كی مووچه‌ بوویه‌ ئارمانجا سه‌ره‌كی و به‌راهی و دووماهییا گه‌له‌ك كه‌سان كو ب ئاوازا ئەوان هاتینه‌ خاپاندن، و ئه‌و ئاماده‌نه‌ كو ده‌ستان ژ هه‌ر تشته‌كێ پیرۆز ل ئەڤی وه‌لاتی به‌رده‌ن داكو مووچه‌یه‌ك پێ بهێته‌ دان! ئه‌ڤه‌ د ده‌مه‌كیدا كو مووچه‌یێ ئەوان مافێ وانه‌ و نابیت ل به‌رامبه‌ر هیچ ته‌نازول یان داگێرانه‌كا سیاسی بهێته‌ دان. د ئه‌نجامێ ئه‌ڤێ هه‌ولا ئەواندا ڕۆژ ب ڕۆژ ملله‌تێ كورد د چاڤێن دوژمناندا ڕه‌زیلتر و زه‌لیلتر بوون و هه‌سته‌ك ل ده‌ف ئەوان په‌یدا بوو كو هه‌رچه‌ند پتر ئەڤی ملله‌تی برسی بكه‌ن ئه‌و دێ پتر ده‌ست ژ ئارمانج و ده‌ستكه‌فتێن خۆ‌ به‌رده‌ن و دێ پتر ل دژى حكوومه‌ت و سه‌ركرده‌یێن خۆ‌ ڕاوه‌ستن، و تشتێ پتر ژ هه‌ر تشته‌كی ئه‌ڤ قه‌ناعه‌ته‌ ل ده‌ف ئەوان زێده‌ كری ئه‌و جاش و خۆ‌فرۆشێن كورد بوون كو ڕۆژانه‌ د ڕاگه‌هاندنێن ئەواندا یان د كور و كۆمبوونێن ئەواندا حكومه‌ت و هه‌رێما كوردستانێ ب بێهێز و بێده‌ستهه‌لات نیشان ددان و ئه‌و هانددان كو چ نه‌مایه‌ سه‌ركردایه‌تییا كوردی دێ ئالایێ سپی بلند كه‌ت و بۆ دوژمنان كه‌ڤیته‌ سه‌ر چوكان یان دێ كه‌ڤیته‌ به‌ر پێلا توڕه‌ییا میلله‌تی و دێ ب ئێكجاری ژناڤ چیت و تشته‌ك ب ناڤێ كوردستان و دوزا كوردان نامینیت!!
وه‌كی ڕۆژێ دیاره‌ كا مه‌به‌ستا مه‌ چییه‌ و كینه‌؟ و ئه‌و كه‌س و لایه‌ن ل به‌ر چاڤێن مه‌ هه‌مییان ددیار و ئاشكرانه‌، د به‌رامبه‌ردا بۆ هه‌ر وژدانه‌كا زیندی و هه‌ر چاڤه‌كێ ب پروپاكندا “مووچه‌یێ پیرۆز” كوره‌ نه‌بووی دیار بوو كو كییه‌ ل سه‌ر مافێ ملله‌تی موكوڕه‌ و هه‌ولێن نه‌هێلانا ئاریشه‌یێن ڕۆژانه‌یێن ئەوان دده‌ت و ل به‌رامبه‌ر زولما دوژمنان ڕاوه‌ستیایه‌، لێ د هه‌مان ده‌مدا ئاماده‌ نینه‌ كو ب پێنگاڤه‌كێ ژى داگێڕانێ ژ كه‌رامه‌ت و پیرۆزییێن ملله‌تێ خۆ‌ نه‌كه‌ن، و دیروك دبێژیته‌ مه‌ كو سه‌ركه‌فتن ته‌نها بۆ ئەڤی لایه‌نییه‌ و شه‌ڤا به‌رته‌نگییێ چه‌ندا درێژ و فڕێن چه‌كچه‌كیله‌یێن خوەفرۆش چه‌ند بلند بیت ل دووماهییێ ڕۆژا ڕاستگویی و خونه‌چه‌ماندنێ دێ هه‌لێت و جاش و خوەفرۆش دێ چنه‌ ئەوى جهێ تایبه‌ت ژ مێژوویێ كو بۆ ئەوان هاتییه‌ چێكرن ئه‌وژى زبلدانه‌!
“ئەز گەڕیام دونیایێ من دیت ستوون و خانی تێر ئەیوان، من نە دیت وەك جەحشێ كورد ئەحمەق و  پیس و نەزان”
ئەردەوان زاخۆیی