دوویه‌مین كۆنفرانسێ زانستیێ نێڤده‌وله‌تى یێ فه‌كۆلتیا زانستێن مرۆڤایه‌تى هاته‌ گێران

لژێر چاڤدێریا به‌رێز پرۆفیسۆرێ هاریكار دكتۆر (لزگین عبدى جمیل) سه‌رۆكێ زانكۆیا زاخۆ و ب ئاماده‌بوونا به‌رێزان هاریكارێن سه‌رۆكێ زانكۆیێ و جه‌نابێ به‌رێز (خالد دوسكى) وه‌زیرێ ڕه‌وشه‌نبیرى و لاوان یێ حكومه‌تا هه‌رێما كوردستانێ و ڕاگرێن فه‌كۆلتى و كۆلیژان و مامۆستا و ڤه‌كۆله‌رێن هێژا و قوتابیێن زانكۆیێ، دوویه‌مین كۆنفرانسێ زانستیێ نێڤده‌وله‌تى یێ فه‌كۆلتیا زانستێن مرۆڤایه‌تى یێ پشكا زمانێ كوردى ل زانكۆیا زاخۆ هاته‌ گێران.
لده‌ستپێكێ ئاماده‌بوویان وه‌ك ڕێزگرتن ل جانگۆریێن بزاڤا ڕزگاریخوازا گه‌لێ كورد خوله‌كه‌كێ ب بێده‌نگى دگه‌ل سروودا نیشتیمانییا (ئه‌ى ڕه‌قیب) ڕاوه‌ستیان، پاشان بڕگه‌ و په‌نه‌لێن كۆنفرانسى ب په‌یڤا هێژا پرۆفیسۆرێ هاریكار دكتۆر (دیار عه‌بدولكه‌ریم سه‌عید) ڕاگرێ فه‌كۆلتیا زانستێن مرۆڤایه‌تى ده‌ستپێكرن، ڕاگرێ فه‌كۆلتیێ د په‌یڤا خۆ دا بخێرهاتنا گشت مێهڤانان و ڤه‌كۆله‌ر و مامۆستایێن زانكۆیان كر، هه‌روه‌سا ئاماژه‌ ب گرنگییا كۆنفرانسى د ده‌مێ نها دا و باس ل دیرۆكا گه‌لێ كورد و قۆناغێن تێدا ده‌ربازبوویى كر و ب ئاوایه‌كێ ژ دلكارانه‌ لسه‌ر ئالیێ (كه‌لتوور، فه‌رهه‌نگ و چاند و هۆنه‌رێ كوردى) ئاخڤت. لدویڤدا به‌رێز پرۆفیسۆرێ هاریكار دكتۆر (حسێن ئۆسمان عه‌بدولره‌حمان) سه‌رۆكێ پشكا زمان و ئه‌ده‌بێ كوردى په‌یڤه‌ك خواندن و د په‌یڤا خۆ دا چه‌ندین ئالیێن كۆنفرانسى ژ بۆ ئاماده‌بوویان ڕۆنكرن، هه‌روه‌سا ماوه‌یێ ڕاگه‌هاندنا كۆنفرانسى و وه‌گرتنا ڤه‌كۆلینان و هژماره‌یا ڤه‌كۆلینێن ژ زانكۆیێن هه‌رێما كوردستانێ و ده‌رڤه‌یى هه‌رێمێ ژ بۆ كۆنفرانسى هاتین ئاشكه‌را كرن ، لداویا په‌یڤا خۆ سه‌رۆكێ پشكا زمانێ كورديێ سوپاسیێن تایبه‌ت ئاراسته‌یى ته‌ڤایا ئالیێن هاریكار ژ بۆ گێرانا كۆنفرانسى و هاریكاریا وان د گشت ئالیاندا كر.
پشتى په‌یڤێن كۆنفرانسى ب داوى هاتین، لده‌مژمێر (11:45) سپێدێ، دیبه‌یتا كۆنفرانسى ئه‌وا لژێر ناڤونیشانێ (پۆلیتیكێن زمانى و پاشه‌رۆژا زمانێ كوردى) ب مێهڤانداریا به‌رێز (پ.د. عه‌بدولوه‌هاب خالد موسا) هاریكارێ سه‌رۆكێ زانكۆیا زاخۆ بۆ كاروبارێن قۆتابییان و ماموستایێ زمانناسیێ، به‌رێز (خالد دوسكى) وه‌زیرێ ڕه‌وشه‌نبیرى و لاوان، به‌رێز (پ.ه. د. ئه‌حمه‌د قه‌ره‌نى) ڕاوێژكارێ وه‌زیرێ په‌روه‌ردێ و به‌رێز (پ.د. هۆگر محمود فه‌ره‌ج) پسپۆرێ زمانى ل زانكۆیا سلێمانیێ ده‌ستپێكر، هه‌ژییه‌ بێژین كو ئه‌ندامێن دیبه‌یتێ د ماوه‌یێ ده‌ستنیشانكریدا دیتن و بۆچوونێن خۆ لدور بابه‌تێ هاتییه‌ ده‌ستنیشانكرن ده‌ربرین و دانوستانده‌نه‌ك ئه‌كادیمى ب هه‌ڤرا ئه‌نجامدان. پاشان ته‌وه‌رێ خه‌لاتكرنا مامۆستایێن ناسناڤێ خۆ یێ زانستى بۆ سالا خواندنێ (2016ـ2017) به‌رزكرین هاته‌ لدارخستن و خه‌لاتێن تایبه‌ت ب مامۆستایێن زانكۆیا زاخۆ هاتنه‌دان. جهێ ئاماژه‌پێدانێیه‌، كو لده‌مژمێر (12:30) نیڤرۆ، د ڕێوره‌سمه‌ك تایبه‌تدا په‌رتووكخانه‌یا فه‌كۆلتیا زانستێن مرۆڤایه‌تى ژ ئالیێ وه‌زیرێ ڕه‌وشه‌نبیرى و لاوان هاته‌ ڤه‌كرن، فه‌ره‌ بێژین كو په‌رتووكخانه‌یا ناڤهاتى یه‌كه‌م په‌رتووكخانه‌یه‌ ل هه‌رێما كوردستانێ كو ب سیسته‌مه‌ك ئه‌لیكترۆنى یێ هه‌رى پێشكه‌ڤتى و هه‌روه‌سا ب شێوه‌یێ په‌رتووك ژى لبه‌رده‌ستێ خوانده‌ڤانان بیت و خوانده‌ڤان ئازاده‌ ب حه‌زا خۆ ل په‌رتووكخانه‌یێ دابنیشیت و په‌رتووكان ب ئارامى و لدویڤ حه‌ز و ڤیانا خۆ بخوینیت.
په‌نالێ داویێ لده‌مژمێر (4:00) ئێڤارى ب ڕێڤه‌به‌ریا به‌رێز پرۆفیسۆرێ هاریكار دكتۆر (حسێن ئۆسمان عه‌بدولره‌حمان) ده‌ستپێكر و ڤه‌كۆله‌ران ڤه‌كۆلینێن خۆ د ده‌مه‌كێ دیاركریدا پێشكێشكرن، پاشان ده‌رفه‌ت ب ئاماده‌بوویان هاته‌دان كو دیتن و نێرینێن خۆ پێشكێش بكه‌ن.