ل ڕۆژا دووشه‌مبێ ڕێكه‌ڤتى (25/11/2019) لده‌مژمێر (10:00) سپێدێ، سه‌رۆكایه‌تییا پشكا زمانێ كوردیێ ب هه‌ڤكارى دگه‌ل سه‌نته‌رێ زاخۆ بۆ ڤه‌كۆلینێن كوردى، ڕێوره‌سمه‌ك تایبه‌ت ب هه‌لكه‌ڤتا چاپبوونا چوار به‌رهه‌مێن نوى یێن ڕێزدار دكتۆر (باڤێ نازێ) نڤیسكار و ئه‌كادیمییێ كورد ل هۆلا (خه‌لیل خه‌یالى) ل فه‌كۆلتیا زانستێن مرۆڤایه‌تى گێران.
لده‌ستپێكێ ئاماده‌بوویى وه‌ك ڕێزگرتن ل جانگورییێن بزاڤا ڕزگاریخوازا گه‌لێ كورد خۆله‌كه‌كێ ب بێده‌نگى ڕاوه‌ستییان، پاشان په‌یڤا ڕاگرییا فه‌كۆلتیێ ژ لایێ به‌رێز پرۆفیسۆر دكتۆر (هوگر تاهر ته‌وفیق) هاته خواندن، ڕاگرى د په‌یڤا خۆ دا ئاماژه ب كار و به‌رهه‌مێن نڤیسكارى یێن لسه‌ر خه‌بات و دوزا گه‌لێ كورد نڤێساین دا، هه‌روه‌سا ب ئاوایه‌كێ تایبه‌ت باسێ به‌رهه‌مێن ئه‌ده‌بى یێن نڤیسكارى كرن. لدوماهییا په‌یڤا خۆ جه‌نابێ ڕاگرى داخوازا سه‌ركه‌ڤتنێ بۆ دكتۆر (باڤێ نازێ) خوازت و پشته‌ڤانییا ڕاگریێ بۆ كار و به‌رهه‌مێن وى دا دیاركرن.
لدویڤدا به‌رێز دكتۆر (كامه‌ران ئیبراهیم خه‌لیل) سه‌رۆكێ پشكا زمانێ كوردیێ په‌یڤا بخێرهاتن و ده‌ستپێكرنا ڕێوره‌سمان پێشكێشكر، دكتۆرى د په‌یڤا خۆ دا ب دله‌كێ مه‌زن و ب چاڤێن تژى ڤیان باس ل به‌رهه‌م و نڤێسینێن نڤیسكارێ گه‌لێ مه و ئه‌و خزمه‌تا پێشكێشى په‌رتووكخانه‌یا كوردى ب شێوه‌یه‌كێ گشتى كرى كو كه‌ده‌ك بێ هه‌مپایه كر. هه‌روه‌سا د ئالییه‌كێ دى یێ گۆتنێن خۆ دا سه‌رۆكێ پشكێ گۆت: پێدڤییه هه‌ر كه‌سه‌ك ل جهێ خۆ هه‌ست ب به‌رپرسیاریێ بكه‌ت و گرنگییێ ب كه‌سایه‌تییێن وه‌ها گرنگ بده‌ت، ژبه‌ركو ئه‌ڤ جۆره مرۆڤه خه‌زینه‌یێن پڕ ب بوهانه و دڤێت ئه‌م هه‌ر تشتى پێشكێشكى وان بكه‌ن، داكو ل به‌رامبه‌ر مێژوویێ سه‌رفه‌راز ببین.
پاشان په‌نه‌له‌ك تایبه‌ت ده‌رباره‌یى به‌رهه‌مێن نوى چاپبوویى ئه‌وێن لژێر ناڤونیشانێن (خه‌ونا ب هێڤى، هێسرێن گۆتنا بێ گۆتن، هاوارا نه بهیستى، المنبوذ) ژلایێ ماموستایێن پشكا زمانێ كوردیێ به‌رێزان (شڤان قاسم حه‌سه‌ن ـ دلێر كه‌مال ئه‌حمه‌د) هاته پێشكێشكرن.
هه‌ژییه بێژین، كو هه‌ر دوو به‌رێزان ب ئاوایه‌كێ ئه‌كادیمییانه باسێ مژار و بابه‌تێن د ڕۆمانێن ماموستاییدا هاتینه ئازراندن كر، پاشان گۆتن و شرۆڤه‌یێن خۆ لدور به‌رهه‌مان ب ئاوایه‌كێ ڤه‌كرى گۆتن.
لدوماهییێ، د ڕێوره‌سمه‌ك تایبه‌تدا نڤیسكارێ گه‌لێ مه (باڤێ نازێ) ڕۆمانێن خۆ ب ئیمزایا خۆ پێشكێشى ماموستا و قوتابییێن زانكۆیا زاخۆ كرن و ب ئه‌ڤێ چه‌ندێ قوتابى و ماموستایان ب ڕێزبه‌ندى به‌رهه‌م ژ نڤیسكارى وه‌رگرتن و هه‌سته‌ك خۆش و ب جۆش ڕۆیێ وان داپۆشیبوو.
چەند وێنەیەکێن رێورەسمێ :
