سەنتەرێ زاخو بو ڤەکولینێن کوردی

گرنگیا سەنتەرێن ڤەکولینان:

دڤى سەردەمێ نوکەدا سەنتەرێن ڤەکولینان گرنگیەکا مەزن هەنە چونکە ئەڤ سەنتەرە (دیتنا پێشوەخت یان بوچوونا ئایندەیى) بو خواندن و ڤەکولینا کێشە و ئاریشەیێن زانستى (مروڤایەتى و زانستى) دەستنیشان دکەن.

سەبارەت سەنتەرێن ڤەکولینێن مروڤایەتى د سەردەمێ نوکەدا، ئەڤان سەنتەران رولەکێ مەزن د جیهانا پێشکەفتى و شارستانیدا هەیە و مەبەست ژێ ئەوروپا روژئاڤا و ئەمریکایە، و گرنگیا وان د هندێدایە کو ئەڤ سەنتەرە سیاسەتا ئایندەییا حکومەتان دەستنیشان دکەن لەوڕا د دەمێ روودانا هەر بوویەرەکێ-هەرچەند بچووک ژى بیت- حکومەت بێى راوەرگرتن و دانوستاندنێ دگەل سەنتەرێن ڤەکولینان چ پێنگاڤان ناهاڤێژن و دەست ب چ کارەکێ ناکەن. بو نمونە ل سەر ئاستێ سیاسەتا دەرەکیا دەولەتان ژمارەیەکا سەنتەرێن تایبەتمەند هەنە کو هندەک ژوان سەر ب حکومەتێ نە و هندەکێن دى سەربەخونە و دکەڤنە دناڤ زانکویێن بناڤودەنگێن وەلاتیدا، و هوسا سەبارەت هەمى وەزارەتێن دى ژى.

سەبارەت سەنتەرێن دناڤ زانکویێن ئەکادیمى دا، بەرنیاسى و گرنگیا هەر زانکویەکێ ل هەر جهەکێ ب هێزا سەنتەرێن ڤەکولینێن وێڤە گرێدایە نە ب رووبەرێ بەرفرەهیا وێ یا ژمارا قوتابیێن وێ یان پشکێن و مێژوویا وێ یا دێرین ڤە، ئانکو د سەردەمێ نوکە دا هندەک زانکو هەنە کو مێژوویا دامەزراندنا وان ژ بیست تاسیهـ سالان دەرباز نابیت بەلێ ناڤودەنگێ وان ژ زانکویێن خودان سەد سالێن سەربورێ مەزنترە! و ئەڤە ڤەدگەریتەڤە بو هێزا سەنتەرێن وێ یێن زانستى و مروڤایەتى بو دەرکرنا بەرهەمێن هێژا کو ژلایێ خەلکى ڤە ل دەرڤەى زانکویێ دهێنە بکار ئینان، و سەنتەرێن حکومى و نە حکومى ل ڤى باژێرى دا مفاى ژێ وەردگرن لەوڕا سەنگ و بەهایێ هەر زانکویەکێ دڤى دەمیدا ب شێوەیەکێ سەرەکى ب ژمارا سەنتەرێن وێ یێن ڤەکولینان ڤە گرێدایە نەکو ب ژمارا پشکان و گوتنا سمیناران بتنێ ڤە.